తెరాస త్యాగాలు చేసింది: కాకా

న్యూఢిల్లీ: తెలంగాణ రాష్ట్ర సమితి (తెరాస) ప్రజాప్రతినిధుల రాజీనామాలను కాంగ్రెస్ సీనియర్ పార్లమెంటు సభ్యుడు జి. వెంకటస్వామి ప్రశంసించారు. చరిత్రలో మొదటిసారి ఇంత మంది శాసనసభ్యులు, పార్లమెంటు సభ్యులు, ఎమ్మెల్సీలు రాజీనామాలు చేశారని ఆయన బుధవారం మీడియా ప్రతినిధులతో అన్నారు. కాంగ్రెస్ ఆంధ్రప్రదేశ్ వ్యవహారాల ఇంచార్జీ వీరప్పమొయిలీ ఆదేశాలను బేఖాతరు చేస్తూ కాంగ్రెస్ సీనియర్ నాయకులు ఢిల్లీలో వెంకటస్వామి ఇంట్లో సమావేశమయ్యారు.

ఈ సమావేశానికి ప్రదేశ్ కాంగ్రెస్ కమిటీ (పిసిసి) మాజీ అధ్యక్షుడు కె. కేశవరావు హాజరు కావడం విశేషం. తెరాస ప్రజాప్రతినిధులు రాజీనామాలు చేసి త్యాగాలు చేశారని వెంకటస్వామి అన్నారు. తెలంగాణపై తమ పార్టీ అధిష్ఠానవర్గం ఏదో ఒకటి తేల్చాలని ఆయన కోరారు. తెలంగాణ రాష్ట్రం ఏర్పాటు చేయకపోతే ప్రజలు బుద్ధి చెప్తారని ఆయన అన్నారు.