గడువు ప్రకారమే ఎన్నికలు: సోనియా

న్యూఢిల్లీ: లోకసభకు గడువు ప్రకారమే ఎన్నికలు జరుగుతాయని ఎఐసిసి అధ్యక్షురాలు సోనియా గాంధీ చెప్పారు. ముందస్తు ఎన్నికలు జరగబోవని ఆమె తెలిపారు. కాంగ్రెస్ పార్లమెంటరీ పార్టీ సమావేశంలో ఆమె మంగళవారంనాడు ప్రసంగించారు. దీంతో ముందస్తు ఎన్నికల ఊహాగానాలకు తెరపడినట్లే. త్వరలో జరగబోయే పలు రాష్ట్రాల అసెంబ్లీ ఎన్నికలకు సిద్ధం కావాలని పార్టీ ఎంపీలకు విజ్ఞప్తి చేశారు. ముందస్తు ఎన్నికలకు వెళ్లే ఆలోచన లేదని ఆమె అన్నారు. అయితే ఎన్నికలు ఎప్పుడు వచ్చినా సిద్ధంగా ఉండాలని ఆమె సూచించారు.

రైతులను లక్ష్యంగా చేసుకొని వరాలు కురిపించిన ఇటీవలి కేంద్ర బడ్జెట్ విశేషాలను ఆమె తన ప్రసంగంలో ప్రస్తావించారు. సాధారణ పౌరులకు లబ్ది చేకూరే విధంగా యూపీఏ ప్రభుత్వం అమలు చేస్తున్న పథకాలను ప్రజల్లోకి తీసుకెళ్లాలని సోనిగా గాంధీ కోరారు. ఇటీవల జరిగిన అసెంబ్లీ ఎన్నికల ఫలితాలను నిరాశపరిచిన మాట వాస్తవమేనని, అయితే వాటిని అనుభవంగా స్వీకరించి వచ్చే శాసనసభ ఎన్నికల్లో విజయానికి కృషి చేయడం అవసరమని ఆమె అన్నారు. అభ్యర్థుల ఎంపికలో జాగ్రత్తగా వ్యవహించాలని, అసెంబ్లీ ఎన్నికల్లో ఐకమత్యాన్ని, క్రమశిక్షణను చాటాలని సోనియా ఎంపీలను కోరారు.