యువీని కలిసింది తక్కువే: దీపిక

ముంబయి: భారత వన్డే క్రికెట్ జట్టు వైస్ కెప్టెన్ యువరాజ్ సింగ్ ను తాను కొద్ది మార్లు మాత్రమే కలిశానని బాలీవుడ్ సంచలన నటి దీపికా పడుకొనే చెప్పింది. యువీ గురించి తెలుసుకోవడానికి తాను కలిశానని ఆమె చెప్పింది. రణబీర్ కపూర్ తో తన ప్రేమ వ్యవహారం గురించి ఆమె ఎట్టకేలకు పెదవి విప్పింది. రణబీర్ తో ప్రేమ వ్యవహారం నడుపుతున్నట్లు అంగీకరించింది. చాలా మంది తారల మాదిరిగా సంబంధాల గురించి దాచుకునే అలవాటు తనకు లేదని ఆమె చెప్పింది.

రణబీర్, దీపికా సిద్ధార్థ ఆనంద్ బచ్నా ఎ హసీనా సినిమాలో కలిసి నటిస్తున్నారు. రణబీర్ ను ఆమె ప్రశంసలతో ముంచెత్తింది. మొదటి సినిమాతోనే షారూఖ్ ఖాన్ తో నటించే అవకాశం రావడం అదృష్టమని ఆమె అన్నది. తన తొలి యాక్షన్ చిత్రం చాందినీ చౌక్ పై ఆమె ఉద్వేగభరితంగా స్పందిస్తోంది. ఆమె చైనాలో అక్షయ్ కుమార్ తో కలిసి స్టంట్ దృశ్యాల్లో నటిస్తోంది.