ఢిల్లీ నుంచి వైయస్ కు పిలుపు

హైదరాబాద్: ముఖ్యమంత్రి డాక్టర్ వైయస్ రాజశేఖర రెడ్డికి ఢిల్లీ నుంచి పిలుపు వచ్చింది. ఢిల్లీ రావాల్సిందిగా కాంగ్రెస్ అధిష్ఠానవర్గం ముఖ్యమంత్రిని పిలిచింది. తాజా పరిణామాల నేపథ్యంలో తెలంగాణపై చర్చించేందుకు ముఖ్యమంత్రి పార్టీ అధిష్ఠానవర్గం ఢిల్లీకి ఆహ్వానించినట్లు సమాచారం. కాంగ్రెస్ తెలంగాణ సీనియర్లు ఇటీవల ఢిల్లీ వెళ్లి ఎఐసిసి అధ్యక్షురాలు సోనియా గాంధీతో చర్చించడం, తాము తలపెట్టిన భువనగిరి సభను సీనియర్లు వాయిదా వంటి పరిణామాలు చోటుచేసుకున్నాయి. ఈ పరిస్థితులపై ముఖ్యమంత్రితో పార్టీ అధిష్ఠానవర్గం చర్చించాలనుకుంటున్నట్లు తెలుస్తోంది.

తెలంగాణ రాష్ట్ర సమితి (తెరాస) రాజీనామాల వల్ల జరిగే ఉప ఎన్నికలపై కూడా ముఖ్యమంత్రితో చర్చించవచ్చు. ఈ ఎన్నికల్లో అనుసరించాల్సిన వ్యూహంపై, ముఖ్యమంత్రి చేస్తున్న ఆలోచనలపై వారు తెలుసుకోవాలనుకుంటున్నట్లు తెలుస్తోంది. ముఖ్యమంత్రి డాక్టర్ వైయస్ రాజశేఖర రెడ్డి రేపు (మంగళవారం) మధ్యాహ్నం ఢిల్లీకి బయలుదేరి వెళ్తున్నారు. సోమవారంనాడు ఆయన సిపిఐ నేతలకు విందు ఇస్తున్నారు. పార్టీ జాతీయ మహాసభల దృష్ట్యా సిపిఐ నేతలు ప్రస్తుతం హైదరాబాదులోనే ఉన్నారు.