వైయస్ క్షమాపణ చెప్పాలి: కిషన్ రెడ్డి

హైదరాబాద్: ప్రజలకు ముఖ్యమంత్రి డాక్టర్ వైయస్ రాజశేఖర రెడ్డి క్షమాపణ చెప్పాలని భారతీయ జనతా పార్టీ (బిజెపి) శాసనసభ్యుడు జి. కిషన్ రెడ్డి డిమాండ్ చేశారు. అకాల వర్షాలకు ప్రజలు తల్లడిల్లుతుంటే వర్షాలు పడినందుకు ఆనందం వ్యక్తం చేస్తూ వాణిజ్య ప్రకటనలు ఇవ్వడాన్ని ఆయన సోమవారం శాసనసభలో తప్పు పట్టారు. పత్రికలకు ముఖ్యమంత్రి ప్రకటనలు ఇవ్వడం దారుణమని ఆయన వార్తా పత్రికలను ప్రదర్శిస్తూ అన్నారు. అందుకు ప్రభుత్వం సంజాయిషీ ఇచ్చుకోవాలని ఆయన అభిప్రాయపడ్డారు.

ముఖ్యమంత్రి రంగు రంగుల ఫొటోలతో వాణిజ్య ప్రకటనలు ఇచ్చుకోవడం బాధ్యతారహితమని ఆయన అన్నారు. వర్షాల్లో ఆదుకునేందుకు అధికారులు కూడా లేక ప్రజలు ఇబ్బందులు పడ్డారని ఆయన చెప్పారు. ఇటువంటి పరిస్థితిలో వాణిజ్య ప్రకటనలు నిస్సిగ్గుగా ఇచ్చుకోవడం ఏ విధంగా న్యాయమో చెప్పాలని ఆయన అన్నారు.