కారత్ బాబు భేటీకి ప్రాధాన్యం లేదు: బీవి

హైదరాబాద్: కాంగ్రెస్, బిజెపిలను ఓడించడమే తమ లక్ష్యమని సిపియం రాష్ట్ర కార్యదర్శి బి.వి. రాఘవులు అన్నారు. ఉప ఎన్నికల పొత్తులపై ఇంకా నిర్ణయం తీసుకోలేదని ఆయన సోమవారం ఒక ప్రైవేట్ టీవీ చానెల్ కు ఇచ్చిన ఇంటర్వ్యూలో చెప్పారు. ఈ విషయంపై ఏప్రిల్ 2వ తేదీన నిర్ణయం తీసుకుంటామని ఆయన చెప్పారు. ముందు సిపిఐతో చర్చించి ఆ తర్వాత మిగతా పార్టీలతో చర్చలు జరుపుతామని ఆయన అన్నారు. సిపిఐ జాతీయ మహాసభలు ముగియగానే ఆ పార్టీ నాయకులతో మాట్లాడుతామని ఆయన చెప్పారు.

తమ పార్టీ ప్రధాన కార్యదర్శి ప్రకాశ్ కారత్ తెలుగుదేశం పార్టీ నాయకుడు చంద్రబాబునాయుడిని కలిసిన విషయానికి అంత ప్రాధాన్యత లేదని ఆయన చెప్పారు. వారిద్దరి మధ్య రాజకీయాలకు సంబంధించిన చర్చలు జరిగితే జరిగి ఉండవచ్చునని, అయితే వాటికి అంత ప్రాధాన్యం లేదని ఆయన అన్నారు. రాష్ట్రానికి సంబంధించిన రాజకీయాల గురించి చర్చించి ఉంటే తప్పకుండా రాష్ట్ర నాయకులు చర్చల్లో ఉండేవారని ఆయన అన్నారు. రాష్ట్రంలో బిజెపి బలం పుంజుకోవాలని, కేంద్రంలో తిరిగి అధికారంలోకి రావడానికి ప్రయత్నాలు చేస్తోందని, అందువల్ల ఆ పార్టీని నిలువరించాల్సిన అవసరం ఉందని ఆయన అన్నారు.