బిజెపిది ఒంటరి పోరే: వెంకయ్య

హైదరాబాద్: వచ్చే ఎన్నికల్లో రాష్ట్రంలో ఒంటరిగానే పోటీ చేస్తామని భారతీయ జనతా పార్టీ (బిజెపి) సీనియర్ నాయకుడు ఎం. వెంకయ్యనాయుడు చెప్పారు. వచ్చే ఎన్నికల్లో ఏ పార్టీతోనూ పొత్తు పెట్టుకోబోమని ఆయన శుక్రవారం మీడియా ప్రతినిధులతో చెప్పారు. కాంగ్రెస్, వామపక్షాలు, తెలంగాణ రాష్ట్ర సమితి (తెరాస) ఓటు బ్యాంక్ రాజకీయాలకు పాల్పడుతున్నాయని ఆయన విమర్శించారు. రైతు సమస్యలే ఎజెండాగా వచ్చే ఎన్నికల్లో తాము పోటీ చేస్తామని ఆయన చెప్పారు.

కాంగ్రెస్ తెలంగాణ ప్రజలను మోసం చేసిందని, సిపియం తెలంగాణపై ఎటూ తేల్చుకోలేకపోతోందని, తెరాస నిజాం వారసత్వాన్ని కొనసాగిస్తానంటోందని, ఈ స్థితిలో తెరాసతో కలిసి పని చేసే పరిస్థితి ఉండదని ఆయన అన్నారు. నిజాం అరాచకాలను ప్రజలింకా మరిచిపోలేదని, నిజాం రాజకీయ వారసత్వాన్ని కొనసాగిస్తామని తెరాస అనడం సరి కాదని ఆయన అన్నారు. తెలంగాణ రాష్ట్ర ఏర్పాటు జాతీయ పార్టీలతోనే సాధ్యమని ఆయన చెప్పారు.