బాబు అపార్థం చేసుకున్నారు: రోశయ్య

గుంటూరు: ఆరోగ్యాన్ని సరిగా చూసుకోవాలని సూచిస్తే తెలుగుదేశం పార్టీ అధ్యక్షుడు నారా చంద్రబాబునాయుడు అపార్థం చేసుకున్నారని రాష్ట్ర ఆర్థిక మంత్రి కె. రోశయ్య వ్యాఖ్యానించారు. చంద్రబాబు అస్వస్థతకు గురై మెదక్ జిల్లా దుద్దెడలో విశ్రాంతి తీసుకుంటున్న నేపథ్యంలో ఆయన శుక్రవారం మీడియా ప్రతినిధుల సమావేశంలో ఆ వ్యాఖ్య చేశారు. కావాలంటే ప్రభుత్వం చంద్రబాబుకు ఆరోగ్య సంరక్షణను కల్పిస్తుందని ఆయన అన్నారు.

ప్రతిపక్ష నాయకుడైన చంద్రబాబుకు భద్రతను కల్పించడం, ఇతర సౌకర్యాలు కల్పించడం ప్రభుత్వం చేస్తోందని, అవసరమైతే ఆరోగ్య సంరక్షణను కూడా కల్పిస్తుందని ఆయన అన్నారు. చంద్రబాబు ఆరోగ్యంగా ఉండాలన్నదే తమ అభిమతమని, చంద్రబాబు తిరగాలి, కష్టపడాలి, తమను ఓడించాలని ఆయన వ్యంగ్యంగా అన్నారు. తెలంగాణ రాష్ట్ర సమితి (తెరాస) అన్ని సీట్లలో గెలవబోదని ఆయన అన్నారు.