ఇసి నోటీసుకు పొన్నాల వివరణ

హైదరాబాద్: తనకు ఇచ్చిన నోటీసుపై రాష్ట్ర భారీ నీటి పారుదల శాఖ మంత్రి పొన్నాల లక్ష్మయ్య శుక్రవారం ఎన్నికల కమీషనుకు వివరణ ఇచ్చారు. వరంగల్ లోని ప్రభుత్వ పాఠశాలలో అనుమతి లేకుండా సభ నిర్వహించారనే అరోపణపై ఎన్నికల కమీషన్ మంత్రులు జానారెడ్డికి, పొన్నాల లక్ష్మయ్యకు నోటీసులు జారీ చేసింది. పాఠశాలలో ఎన్నికల ప్రచార సభ నిర్వహించలేదని, కొంతమంది కార్యకర్తలతో మాత్రమే మాట్లాడానని ఆయన వివరించారు.

పాఠశాలలో సభ ఏర్పాటు గురించి తనకేమీ తెలియదని, అంతా స్థానిక నాయకత్వమే చూసుకుందని ఆయన అన్నారు. కొంత మంది కార్యకర్తలు రోడ్డుపై తనను కలిశారని, రోడ్డు మీదనే వారితో మాట్లాడానని, వంద నుంచి వందా యాభై మంది దాకా ఉంటారని, దాంతో సమావేశం లాగా కనిపించి ఉంటుందని ఆయన అన్నారు.