మేమే ప్రత్యామ్నాయం: చంద్రబాబు

వరంగల్: కాంగ్రెసుకు భవిష్యత్తులో తామే ప్రత్యామ్నాయమని తెలుగుదేశం పార్టీ అధ్యక్షుడు నారా చంద్రబాబు నాయుడు చెప్పుకున్నారు. యుఎన్ పిఎ, వామపక్షాలు కాంగ్రెసుకు ప్రత్యామ్నాయమవుతాయని, బిజెపి కాదని ఆయన అన్నారు హన్మకొండలో ఎన్నికల ప్రచారంలో పాల్గొన్న ఆయన సోమవారం మీడియా ప్రతినిధుల సమావేశంలో మాట్లాడారు. కర్ణాటకలో కాంగ్రెసుకు ప్రత్యామ్నాయం లేదు కాబట్టి ప్రజలు బిజెపికి ఓటేశారని ఆయన అన్నారు. బిజెపి కాంగ్రెసుకు సరైన ప్రత్యామ్నాయం కాదని ఆయన అన్నారు.

కేంద్రంలోనూ, రాష్ట్రంలోనూ కాంగ్రెసు పని అయిపోయిందని ఆయన అన్నారు. కాంగ్రెసు ప్రజల విశ్వాసం కోల్పోయిందని ఆయన అన్నారు. కర్ణాటక శాసనసభ ఎన్నికల్లోనూ, ఉప ఎన్నికల్లోనూ కాంగ్రెసు ఓడిపోయిందని, తెలంగాణలో జరుగుతున్న ఉప ఎన్నికల్లోనూ కాంగ్రెస్ ఓడిపోతుందని ఆయన చెప్పారు. ప్రజల్లో స్పష్టత ఉందని ఆయన అన్నారు.