కెసిఆర్ అహంకారానికి బుద్ధి: మంత్రులు

హైదరాబాద్: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అహంకార రాజకీయాలకు ప్రజలు బుద్ధి చెప్పారని రాష్ట్ర మంత్రులు సబితా ఇంద్రారెడ్డి, షబ్బీర్ అలీ, ముఖేష్ గౌడ్ అన్నారు. రాజీనామాలు చేయకూడదని చెప్పినా కెసిఆర్ వినలేదని, మాట విననందుకు ప్రజలకు కెసిఆర్ కు బుద్ధి చెప్పారని వారు సోమవారం మీడియా ప్రతినిధుల సమావేశంలో అన్నారు. రెండేళ్ల పాటు యుపిఎ ప్రభుత్వంలో మంత్రిగా ఉన్న కెసిఆర్ ప్రజలకు ఏమీ చేయలేదని వారన్నారు. కెసిఆర్ అక్రమాలకు పాల్పడ్డారని వారు అన్నారు.

తెలంగాణ ప్రజలు తెలంగాణ సెంటిమెంటుతో పాటు అభివృద్ధి కూడా కోరుకున్నారనడానికి ఉప ఎన్నికల ఫలితాలు నిదర్శనమని వారన్నారు. ముఖ్యమంత్రి పదవి నుంచి రాజశేఖర రెడ్డిని తప్పిస్తారని చెప్పిన కెసిఆర్ నే తెలంగాణ ప్రజలు ఆరు జిల్లాల నుంచి తరిమి కొట్టారని వారన్నారు. ఇప్పటికైనా కెసిఆర్ తెలంగాణ ఉద్యమాన్ని సరైన పద్ధతిలో నడిపించాలని వారు సూచించారు. కెసిఆర్ తెలంగాణ వాదం తన సొత్తు అన్నట్లు మాట్లాడారని వారన్నారు.