చిరు కోసం ఇవివి మిమిక్రీ క్యాసెట్

హైదరాబాద్: మెగాస్టార్ చిరంజీవికి రాజకీయాల్లో ఉపయోగించేలా తెలుగుదేశం సినిమా దర్శకుడు ఇవివి సత్యనారాయణ ఒక మిమిక్రీ క్యాసెట్ రూపొందిస్తున్నారట. చిరంజీవిని ప్రశంసిస్తూ, ఇతర రాజకీయ నాయకులను విమర్శిస్తూ ఈ మిమిక్రీ క్యాసెట్ రూపు దిద్దుకుంటోందని టాలీవుడ్ లో ప్రచారం జరుగుతోంది. చిరంజీవికి వచ్చే ఎన్నికల్లో ఈ మిమిక్రీ క్యాసెట్ ఉపయోగపడాలనేది ఇవివి ఉద్దేశ్యమట. అదే సమయంలో చిరంజీవి పర్యటనలో కూడా వాడుకునేలా దీనికి రూపకల్పన చేస్తున్నట్లు వినికిడి.

చిరంజీవి రాజకీయాల్లోకి వస్తారనే వార్తలు ఊపందుకుంటున్న ప్రస్తుత తరుణంలో తెలుగు సినిమా రంగం రెండుగా విడిపోవడం వేగం అందుకుంటోంది. కొంత మంది చిరంజీవిని వ్యతిరేకిస్తుండగా మరికొంత మంది ఆయనను బలపరుస్తున్నారు. చిరంజీవిని ఆసరా చేసుకుని రాజకీయాల్లో తమ ఉనికిని చాటుకోవాలని చూస్తున్నవారు కూడా ఉన్నారు. అటువంటివారు చిరంజీవి దృష్టిని ఆకర్షించడానికి ప్రయత్నిస్తున్నారు.