పార్లమెంటుకు చెప్పే చేస్తాం: ప్రధాని

న్యూఢిల్లీ: అణు ఒప్పందంపై వామపక్షాలు చేస్తున్న హెచ్చరికల తీవ్రతను ప్రధాని డాక్టర్ మన్మోహన్ సింగ్ తగ్గించి చూపే ప్రయత్నం చేశారు. పార్లమెంటుకు అన్ని విషయాలు చెప్పిన తర్వాతనే అణు ఒప్పందాన్ని అమలు చేస్తామని ఆయన చెప్పారు. ఐఎఇఎతోను, ఎన్ ఎస్జీతోను సంప్రదింపుల ప్రక్రియను చేపట్టడానికి ప్రభుత్వాన్ని అనుమతించాలని మాత్రమే తాము కోరుతున్నామని ఆయన అన్నారు. దాదాపు 15 రోజుల తర్వాత అణు ఒప్పందంపై ప్రధాని సోమవారం నోరు విప్పారు.

అమెరికాతో అణు ఒప్పందంపై వామపక్షాల అనుమానాలనే కాకుండా అందరి అనుమానాలను నివృత్తి చేస్తామని ఆయన చెప్పారు. అణు ఒప్పందంపై ప్రభుత్వం ముందుకు సాగితే మద్దతు ఉపసంహరించుకుంటామని సిపిఎం కార్యదర్శి ప్రకాష్ కారత్ చేసిన ప్రకటనపై ప్రతిస్పందిస్తూ తాము అందర్ని సంతృప్తి పరిచే విధంగా వ్యవహరించగలమని ఆయన అన్నారు. అణు ఒప్పందంపై మాట్లాడాడనికి మొదట నిరాకరించిన ప్రధాని ఆ తర్వాత విలేకరులకు అడిగిన ప్రశ్నలకు సమాధానాలిస్తూ పోయారు.