పొత్తు ఉండాలి: టిడిపి నేత కడియం

హైదరాబాద్: తమ పార్టీ, తెలంగాణ రాష్ట్ర సమితి (తెరాస) కలిసి పోటీ చేస్తే తెలంగాణ రాష్ట్రం సిద్ధిస్తుందని తెలుగుదేశం పార్టీ నాయకుడు కడియం శ్రీహరి అన్నారు. తెలుగుదేశం పార్టీ తెలంగాణకు అనుకూలంగా నిర్ణయం తీసుకోవాలని, తద్వారా తెరాసతో పొత్తు పెట్టుకోవాలని ఆయన సోమవారం మీడియా ప్రతినిధులతో అన్నారు. ఈ రెండు పార్టీలు పొత్తు పెట్టుకుంటే తెలంగాణలోని 119 శాసనసభ స్థానాల్లో 90 నుంచి 100 స్థానాలు వస్తాయని ఆయన అభిప్రాయపడ్డారు. తెరాస అధ్యక్షుడు కె. చంద్రశేఖర రావు, తమ పార్టీ అధ్యక్షుడు నారా చంద్రబాబునాయుడు మాట్లాడుకున్నట్లు వార్తలు వచ్చాయని, ఇది శుభపరిణామమని ఆయన అన్నారు. తెలంగాణకు జరుగుతున్న అన్యాయాన్ని నివారించడానికి ప్రత్యేక రాష్ట్రమే పరిష్కారమని ఆయన చెప్పారు.

తెలుగుదేశం పార్టీతో పొత్తు పెట్టుకునే విషయంలో తెలంగాణ మేధావుల కోరిక మేరకు నడుచుకుంటామని తెరాస నాయకుడు హరీష్ రావు అన్నారు. తమకు పదవులు, సీట్లు ముఖ్యం కాదని, తెలంగాణ రాష్ట్రం ఏర్పాటే ముఖ్యమని, తెలంగాణ రాష్ట్రం కోసం తాము నిర్ణయం తీసుకుంటామని ఆయన చెప్పారు. అందుకు అనుగుణంగా తెలుగుదేశం పార్టీ నిర్ణయం తీసుకోవాలని, అప్పుడు పార్టీలో చర్చించి పొత్తులపై నిర్ణయం తీసుకుంటామని ఆయన చెప్పారు. కెసిఆర్, చంద్రబాబు పొత్తులపై మాట్లాడుకున్నట్లు పత్రికలు వార్తలు రాశాయని, అందువల్ల తానేమీ మాట్లాడబోనని, కెసిఆర్ గానీ చంద్రబాబు గానీ చెప్పి ఉంటే స్పందించే అవకాశం ఉండేదని ఆయన అన్నారు.