సోమనాథ్ పై బహిష్కరణ వేటు

న్యూఢిల్లీ: స్పీకర్ సోమనాధ్ చటర్జీని సిపిఎం బుధవారంనాడు బహిష్కరించింది. ఈ విషయమై త్వరలో ప్రకటన వెలువడే అవకాశం ఉంది. సిపిఎం పోలిట్ బ్యూరో సమావేశంలో సోమనాధ్ వ్యవహారంపై బుదవారం సుదీర్ఘంగా చర్చించింది. పార్టీ ఆదేశాలను ధిక్కరించి లోకసభ స్పీకరుగా కొనసాగడంపై పార్టీ ఆ నిర్ణయం తీసుకుంది.

యుపిఎ ప్రభుత్వానికి వామపక్షాలు మద్దతు ఉపసంహరించుకున్న నేపథ్యంలో స్పీకర్ పదవికి రాజీనామా చేయాలని పార్టీ సోమనాధ్ ఛటర్జీని ఆదేశించింది. అయితే ఆయన అందుకు నిరాకరించి స్పీకరుగా కొనసాగారు. స్పీకర్ పదవి రాజకీయాలకు అతీతమైందని ఆయన చెప్పుకుంటూ వచ్చారు.