కలిసి దేశవ్యాప్త ప్రచారం: బాబు

హైదరాబాద్: కాంగ్రెస్, బిజెపిలకు వ్యతిరేకంగా దేశవ్యాప్తంగా ప్రచారం సాగిస్తామని తెలుగుదేశం పార్టీ అధ్యక్షుడు నారా చంద్రబాబునాయుడు చెప్పారు. ఐక్యప్రగతిశీల కూటమి (యుపిఎ) ప్రభుత్వ విధానాలకు వ్యతిరేకంగా, మత శక్తులకు వ్యతిరేకంగా కాంగ్రెస్, బిజెపియేతర పార్టీలన్నింటితో కలిసి దేశవ్యాప్త ప్రచారం సాగిస్తామని ఆయన చెప్పారు. అనంతపురం జిల్లాలో మీ కోసం యాత్ర చేస్తున్న చంద్రబాబు గురువారం మీడియా ప్రతినిధులతో మాట్లాడారు. బహుజన సమాజ్ పార్టీ (బిఎస్పీ) నేత మాయావతితో, వామపక్షాలతో కలిసి యుఎన్పియె కలిసి పని చేస్తుందని ఆయన చెప్పారు.

కాంగ్రెస్ ప్రభుత్వ విధానాలు లోపభూయిష్టంగా ఉన్నాయని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డికి దూరదృష్టి లేదని ఆయన విమర్శించారు. మహా కూటమి ఏర్పాటు ఇప్పుడే సాధ్యం కాదని, అయితే కాంగ్రెస్, బిజెపి కూటములకు వ్యతిరేకంగా కలిసి పని చేయాలని అనుకున్నామని ఆయన చెప్పారు. మీ కోసం యాత్ర సందర్భంగా ఆయన ప్రజలకు పలు హామీలు ఇచ్చారు. చంద్రబాబు మీ కోసం యాత్ర రేపు అనంతపురంలో ముగుస్తుంది. ఈ సందర్భంగా భారీ బహిరంగ సభను ఏర్పాటు చేస్తున్నారు. వెనుకబడిన ప్రాంతాలను అభివృద్ధి చేయాలనే లక్ష్యంతోనే అనంతపురంలో బహిరంగ సభను ఏర్పాటు చేస్తున్నట్లు చంద్రబాబు చెప్పారు. రాష్ట్రంలో ఇప్పటి వరకు 117 రోజులు చంద్రబాబు మీ కోసం యాత్ర సాగింది.