దేవుడి ఆశీర్వాదాలు మాకే: వైయస్

నిజామాబాద్: మంచి పనులు చేసేవారికి దేవుడి ఆశీర్వాదం ఉంటుందని, తమకు భగవంతుడి ఆశీర్వాదాలున్నాయని ముఖ్యమంత్రి డాక్టర్ వైయస్ రాజశేఖర రెడ్డి అన్నారు. ఇటీవలి వర్షాలే దేవుడు తమ వైపు ఉన్నాడని చెప్పడానికి నిదర్శనమని ఆయన అన్నారు. నిజామాబాద్ జిల్లాలో ఆరోగ్యశ్రీ పథకాన్ని ఆయన శుక్రవారం లాంఛనంగా ప్రారంభించారు. ఆరోగ్యశ్రీ కింద లబ్ధి పొందడానికి తెల్లరేషన్ కార్డు ఉంటే చాలునని, తెల్ల రేషన్ కార్డు ఆరోగ్యశ్రీకి టికెట్ లాంటిదని ఆయన అన్నారు.

అంతకు ముందు ఆయన రంగారెడ్డి జిల్లా దిండిగల్ లో మొక్కను నాటి హుడా తలపెట్టిన నాలుగు లక్షల మొక్కలు నాటే కార్యక్రమాన్ని ప్రారంభించారు. పర్యావరణాన్ని రక్షించుకోవాల్సిన అవసరాన్ని ఆయన ఈ సందర్భంగా నొక్కి చెప్పారు. హైదరాబాదులో కాలుష్యాన్ని అరికట్టాల్సిన అవసరం ఉందని ఆయన అన్నారు.