ఎత్తిపోతలకు ఉచిత విద్యత్: వైయస్

హైదరాబాద్: రాష్ట్రంలోని ఎత్తిపోతల పథకాలకు ఉచిత విద్యుత్తును అందిస్తామని ముఖ్యమంత్రి డాక్టర్ వైయస్ రాజశేఖర రెడ్డి మరో హామీ ఇచ్చారు. దేవాదుల, అలీసాగర్, గుత్ప వంటి ఎత్తిపోతల పథకాలకు 3 వేల మెగావాట్ల విద్యుత్తు అవసరమవుతుందని ఆయన చెప్పారు. విద్యచ్ఛక్తిపై ఆయన శుక్రవారం శాసనసభలో ప్రకటన చేశారు. వచ్చే ఐదేళ్లు పరిశ్రమలకు, గృహావసరాలకు విద్యుత్తు చార్జీలు పెంచబోమని ఆయన చెప్పారు. ప్రస్తుత అనుభవం దృష్ట్యా వ్యవసాయానికి మరో ఐదేళ్ల పాటు ఉచిత విద్యుత్తును అందిస్తామని ఆయన చెప్పారు.

గత తెలుగుదేశం ప్రభుత్వ విధానాల వల్ల విద్యుత్ వ్యవస్థ ఛిన్నాభిన్నమైందని ఆయన విమర్శించారు. వ్యవసాయం దండుగ అని తెలుగుదేశం పార్టీ అన్నదని, వ్యవసాయం గురించి ఆ పార్టీకి తెలియదని ఆయన అన్నారు. తాము ఎన్నికల ప్రణాళికను మత గ్రంధంగా భావిస్తామని, అందులోని ప్రతి హామీని అమలు చేస్తున్నామని ఆయన చెప్పారు. తెలుగుదేశం పార్టీకి కాకుంటే కాకపోయి ఉండవచ్చునని, అవసరాన్ని బట్టి తెలుగుదేశం పార్టీ మాట్లాడి హామీలను మర్చిపోవచ్చునని ఆయన అన్నారు.