హెలికాప్టర్లో వైయస్ చక్కర్లు: బాబు

అనంతపురం: ముఖ్యమంత్రి డాక్టర్ వైయస్ రాజశేఖర రెడ్డి హెలికాప్టర్లో చక్కర్లు కొడుతున్నారు తప్ప రైతుల సమస్యలను పట్టించుకోవడం లేదని తెలుగుదేశం పార్టీ అధ్యక్షుడు నారా చంద్రబాబునాయుడు వ్యాఖ్యానించారు. అనంతపురం జిల్లా వేరుశనగ రైతులను ఆయన గురువారంనాడు పరామర్శించారు. వ్యవసాయ శాఖ మంత్రి ఎన్. రఘువీరారెడ్డి తన శాఖకు సంబంధించిన విషయాలు తప్ప అన్నీ మాట్లాడుతారని ఆయన అన్నారు. ప్రభుత్వం సకాలంలో ఎరువులు అందించలేకపోయిందని, సకాలంలో ఎరువులు చల్లి ఉంటే వేరుశనగ పంటకు నష్టం వాటిల్లి ఉండేది కాదని ఆయన అన్నారు.

తాము అధికారంలోకి వస్తే వేరుశనగ రైతుల కోసం ప్రత్యేకంగా కమీషనరేట్ ను ఏర్పాటు చేస్తామని ఆయన హామీ ఇచ్చారు. రాష్ట్రంలో అత్యధికంగా వేరుశనగ పంట అనంతపురం జిల్లాలోనే వేశారని, పంట నష్టంతో రైతులు తీవ్రంగా నష్టపోయారని ఆయన అన్నారు. రైతుల నష్టాన్ని ప్రభుత్వం పట్టించుకోవడం లేదని ఆయన విమర్శించారు.