తుది దశలో తెలంగాణ అంశం: కెసిఆర్

న్యూఢిల్లీ: తెలంగాణ రాష్ట్ర ఏర్పాటు అంశం తుది దశకు చేరుకుందని తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖరరావు అన్నారు. భారతీయ జనతా పార్టీ (బిజెపి) తెలంగాణపై ప్రతిపాదించిన ప్రైవేట్ బిల్లు ఈ నెల 24వ తేదీన పార్లమెంటులో చర్చకు రానున్న నేపథ్యంలో ఆయన ఢిల్లీకి వచ్చారు. తెలంగాణ అంశంపై చర్చ జరుగుతున్న నేపథ్యంలో ఆ చర్చలో పాల్గొనడం అత్యవసరంగా భావిస్తున్నట్లు ఆయన ఒక ప్రైవేట్ తెలుగు టీవీ చానెల్ ప్రతినిధికి తెలిపారు. తెలుగుదేశం పార్టీ కూడా తెలంగాణకు స్పష్టంగా అనుకూలత వ్యక్తం చేసినందున కాంగ్రెస్ నిర్ణయం తీసుకోవాలని ఆయన అన్నారు.

తెలంగాణపై ప్రణబ్ ముఖర్జీ కమిటీ వెంటనే ప్రభుత్వానికి నివేదిక సమర్పించాలని ఆయన డిమాండ్ చేశారు. తెలంగాణ రాష్ట్ర ఏర్పాటుకు కాంగ్రెసుకు ఇంకా సమయం ఉందని ఆయన అన్నారు. తెలంగాణ రాష్ట్ర ఏర్పాటుకు చర్యలు తీసుకోకపోతే కాంగ్రెస్ తీవ్రంగా నష్టపోవాల్సి వస్తుందని ఆయన అన్నారు. తాము నవ తెలంగాణ పార్టీ (ఎన్టీపి) నేత టి. దేవేందర్ గౌడ్ తో కలిసి పనిచేయడానికి సిద్ధంగా ఉన్నామని ఆయన చెప్పారు. సమయం, సందర్భం వచ్చినప్పుడు తప్పకుండా కలిసి పని చేస్తామని ఆయన చెప్పారు. తెలంగాణ కోసమే పనిచేస్తున్నందున దేవేందర్ గౌడ్ తో కలిసి పనిచేయడానికి అభ్యంతరం ఉండాల్సిన అవసరం లేదని ఆయన అన్నారు.