పత్రికలపై మంత్రి రోశయ్య చిందులు

హైదరాబాద్: మీడియాపై రాష్ట్ర ఆర్థిక మంత్రి కె. రోశయ్య చిందులేశారు. తాను రైస్ మిల్లర్లతో కుమ్మక్కయినట్లు ఈనాడు, ఆంధ్రజ్యోతి పత్రికల్లో వచ్చిన వార్తలపై ఆయన గురువారం మీడియా ప్రతినిధుల సమావేశంలో తీవ్రంగా వ్యాఖ్యానించారు. ఎవరి మీదనైనా ఆరోపణలు వస్తే ఆ వ్యక్తులను సంప్రదించి నిర్ధారించుకుని వార్తలు రాసే సంప్రదాయం ఉండేదని, ఇప్పుడు ఆ సంప్రదాయానికి తిలోదకాలిచ్చారని ఆయన అన్నారు. ఎవరి బుర్రలోనైనా ఆలోచన వస్తే ఎవరి నోటిలోనో పెట్టి ఎవరి జుట్టుకో ముడివేయడం పత్రికలకు పరిపాటి అయిందని ఆయన అన్నారు.

ప్రభుత్వ ప్రతిష్ట తీసి తమ మనసులో ఉన్నవారిని అధికారంలోకి తేవడానికి ఇటువంటి వార్తలు రాస్తున్నారని ఆయన అన్నారు. స్ట్రింగర్లుగా ఉన్నవారు, సైకిల్ వేసుకుని తిరిగినవారు పత్రికాధిపతులయ్యారని, సైకిల్ చైన్ ఊడిపోతే మళ్లీ వేసుకుని తన గదిలోకి వచ్చి చేతులు కడుక్కున్నారని, అటువంటివారు ఇటువంటి తప్పుడు వార్తలు రాస్తున్నారని ఆయన ఆంధ్రజ్యోతి మేనేజింగ్ డైరెక్టర్ రాధాకృష్ణను ఉద్దేశించి వ్యాఖ్యానించారు. అయితే ఈర్ష్యతో తాను ఈ మాటలనడం లేదని ఆయన అన్నారు.