తెలంగాణపై మాట ఇచ్చిన సోనియా

న్యూఢిల్లీ: తెలంగాణ అంశంపై ఈ నెల 25వ తేదీన ప్రధాని మన్మోహన్ సింగ్ తో మాట్లాడుతానని కాంగ్రెస్ అధ్యక్షురాలు సోనియా గాంధీ హామీ ఇచ్చినట్లు నవ తెలంగాణ పార్టీ (ఎన్టీపి) నేత టి. దేవేందర్ గౌడ్ చెప్పారు. దేవేందర్ గౌడ్ నాయకత్వంలోని ఐదుగురు సభ్యుల బృందం గురువారం మధ్యాహ్నం సోనియా గాంధీని కలిసింది. ఈ ప్రతినిధి బృందంతో సోనియా అరగంట సేపు మాట్లాడారు. ప్రధాని జపాన్ పర్యటనలో ఉన్నారని, జపాన్ నుంచి తిరిగి రాగానే తాను ప్రధాని శనివారంనాడు మాట్లాడుతానని ఆమె ఆ బృందానికి హామీ ఇచ్చారు. తెలంగాణ అంశం తమకు కూడా కీలకమేనని, ఈ విషయమై ఆలోచిస్తున్నామని సోనియా తమకు చెప్పినట్లు దేవేందర్ గౌడ్ చెప్పారు.

తెలంగాణపై కాంగ్రెస్ ఇచ్చిన హామీని నిలబెట్టుకోవాలని తాము సోనియాను కోరినట్లు ఆయన తెలిపారు. తెలంగాణ రాష్ట్ర ఏర్పాటుకు ఈ పార్లమెంటు సమావేశాల్లోనే బిల్లు ప్రతిపాదించాలని తాము అడిగామని ఆయన చెప్పారు. తెలంగాణ ప్రజల మనోభావాలను గౌరవిస్తామని హామీ ఇచ్చినందున ఆ హామీని నిలబెట్టుకోవాల్సిన బాధ్యత కాంగ్రెసుపై ఉందని చెప్పామని ఆయన అన్నారు. తెలంగాణపై వాతావరణం సానుకూలంగా ఉందని ఆయన అభిప్రాయపడ్డారు.

వ్యక్తులు కావాలా, ప్రజలు కావాలా అనే విషయాన్ని తేల్చుకోవాల్సింది కాంగ్రెస్ పార్టీయేనని, ప్రజలకు న్యాయం చేయకపోతే నష్టపోతారని ఆయన అన్నారు. తెలంగాణ ఇవ్వకపోతే కాంగ్రెసు నష్టపోతుందని తాను సోనియాతో చెప్పలేదని, ఇది వారి వ్యక్తిగత విషయమని ఆయన అన్నారు. నవంబర్ 1వ తేదీ వరకు వేచి చూసి తాము తెలంగాణ రాష్ట్రాన్ని ప్రకటించుకుంటామని ఆయన చెప్పారు.