నేను కోలుకుంటున్నాను: దాసరి

హైదరాబాద్: తాను కోలుకుంటున్నట్లు ప్రముఖ దర్శక నిర్మాత, మాజీ కేంద్ర మంత్రి దాసరి నారాయణరావు చెప్పారు. తనను పరామర్శించడానికి అన్ని వైపుల నుంచి వెల్లువలా వస్తుండడంతో ఆయన శుక్రవారంనాడు ఈ ప్రకటన చేశారు. దాసరి నారాయణరావుకు విశ్రాంతి లభించేలా చూడాలని వైద్యులు కూడా చెప్పారు. పిత్తాశయంలో రాళ్ల తొలగింపు కోసం దాసరి నారాయణరావు ఒక ప్రైవేట్ ఆస్పత్రిలో శస్త్ర చికిత్స చేయించుకున్నారు. ఆయన ఆస్పత్రిలో చేరినట్లు వార్తలు రావడంతోనే పరామర్శల వెల్లువ మొదలైంది. ముఖ్యమంత్రి డాక్టర్ వైయస్ రాజశేఖర రెడ్డి ఆయనను పరామర్శించారు. రాజశేఖర రెడ్డి పరామర్శతో ఈ వెల్లువ ప్రారంభమైంది.

సినీ ప్రముఖుడు దాసరి నారాయణ రావును ప్రజారాజ్యం పార్టీ అధ్యక్షుడు మెగాస్టార్ చిరంజీవి గురువారం సాయంత్రం పరామర్శించారు. దాసరి త్వరలో కోలుకోవాలని ఆ దైవాన్ని ప్రార్ధిస్తున్నానని చిరు తెలిపారు. చిరంజీవి భార్య సురేఖ, బావమరిది అల్లు అరవింద్‌లు కూడా దాసరిని పరామర్శించారు. భారతీయ కమ్యూనిస్ట్ పార్టీ రాష్ట్ర కార్యదర్శి కె. నారాయణ అనారోగ్యంతో ఆస్పత్రిలో చికిత్స పొందుతున్న దాసరిని కలుసుకున్నారు. ఆయన ఆరోగ్య విషయాన్ని అడిగి తెలుసుకున్నారు. అనంతరం దర్శకుడు కోడి రామకృష్ణ, రేలంగి నరసింహరావు తదితరులు దాసరిని పరామర్శించి బాగోగులు అడిగి తెలుసుకున్నారు.