తెలంగాణపై ఏకాభిప్రాయం ఉంది: దేవేందర్

హైదరాబాద్: తెలంగాణపై ఢిల్లీలో అన్ని పార్టీల మధ్య ఏకాభిప్రాయం కుదిరిందని నవ తెలంగాణ పార్టీ (ఎన్టీపి) నేత టి. దేవేందర్ గౌడ్ చెప్పారు. తెలంగాణ అమరవీరుల స్థూపం వద్ద ఆయన నివాళులర్పించిన అనంతరం శుక్రవారం మీడియా ప్రతినిధులతో మాట్లాడారు. 2009లోగానే తెలంగాణ రాష్ట్రాన్ని సాధించుకోవాల్సిన అవసరం ఉందని, లేకుంటే ఎన్నికల గొడవలో తెలంగాణ అంశాన్ని కొన్ని పార్టీలు పక్కన పెట్టేసే ప్రమాదం ఉందని ఆయన అన్నారు.

తెలంగాణ రాష్ట్ర ఏర్పాటు అంశాన్ని ముందుకు తీసుకుపోవాల్సిన అవసరం ఉందని ఆయన అభిప్రాయపడ్డారు. తెలంగాణకు అనుకూలంగా ఉన్న అన్ని శక్తులనూ ఏకం చేయాల్సిన అవసరం ఉందని, ఈ దిశలో తాము పని చేస్తున్నామని ఆయన చెప్పారు. తెలంగాణ అంశాన్ని ముదుకు తీసుకుపోవడాన్ని వేగవంతం చేస్తామని, వచ్చే రెండు, మూడు రోజుల్లో అందుకు సంబంధించిన కార్యక్రమాన్ని వెల్లడిస్తామని ఆయన చెప్పారు.