ఇసుక స్కాం నాకేం తెలియదు: జెసి

హైదరాబాద్: తూర్పు గోదావరి జిల్లాలో జరిగిన ఇసుక ర్యాంపు కుంభకోణంతో తనకేమీ సంబంధం లేదని రాష్ట్ర పంచాయతీరాజ్ శాఖా మంత్రి జెసి దివాకర్ రెడ్డి చెప్పారు. ముగ్గురు మంత్రుల కమిటీ ముందు ఆయన మంగళవారం వివరణ ఇచ్చారు. ఇసుక ర్యాంపు కుంభకోణంలో జెసి దివాకర్ రెడ్డి ఏడు కోట్ల రూపాయల అవినీతికి పాల్పడ్డారని మరో మంత్రి గొల్లపల్లి సూర్యారావు చేసిన ఆరోపణపై విచారణకు ముఖ్యమంత్రి డాక్టర్ వైయస్ రాజశేఖర రెడ్డి మంత్రులు కె. రోశయ్య, కోనేరు రంగారావు, గీతారెడ్డిలతో కమిటీని వేశారు.

మంత్రుల కమిటీ మంగళవారం రోశయ్య నివాసంలో సమావేశమై దివాకర్ రెడ్డి వాదనలను విన్నది. తనపై గొల్లపల్లి సూర్యారావు చేసిన ఆరోపణల్లో నిజం లేదని దివాకర్ రెడ్డి చెప్పినట్లు సమాచారం. జిల్లాలో ఏదైనా జరిగినప్పుడు తనొక్కడ్నే ఎలా బాధ్యుడ్ని అవుతానని, జిల్లా మంత్రిగా సూర్యారావు ఆ విషయాన్ని అరికట్టాల్సిన అవసరం లేదా అని ఆయన అన్నట్లు తెలుస్తోంది. తాను జిల్లా ఇంచార్జీ మంత్రిగా బాధ్యతలు చేపట్టినప్పటి నుంచి సంభవించిన పరిణామాలను ఆయన కమిటీకి వివరించినట్లు తెలుస్తోంది. మంత్రుల కమిటీ సోమవారంనాడు గొల్లపల్లి సూర్యారావు వాదనలు విన్నది.