కోర్టు ఆదేశాలను ధిక్కరించిన రాజ్

ముంబయి: కోర్టు ఆదేశాలను ధిక్కరిస్తూ మహారాష్ట్ర నవనిర్మాణ సమితి (ఎంఎన్ఎస్) చీఫ్ రాజ్ థాకరే నోరు విప్పారు. మాహారాష్ట్ర ప్రభుత్వం ప్రతీకార రాజకీయాలకు ఒడిగడుతోందని ఆయన విమర్శించారు. తన జడ్ ప్లస్ కెటగిరీ భద్రతను ఉపసంహరించడం మూర్ఖత్వమేనని ఆయన అన్నారు. ఈ మేరకు ఆయన మరాఠీ దినపత్రిక లోక్ సత్తాకు ఇంటర్వ్యూ ఇచ్చారు. ఉత్తరాది వారిపై దాడి విషయంలో తనపై హత్యా కేసు నమోదైనందున భద్రతను ఉపసంహరించడాన్ని ఆయన తీవ్రంగా ఖండించారు.

తన ప్రాణాలకు ముప్పు ఉందని, బస్సు కాల్పుల సంఘటన ఈ విషయాన్ని తెలియజేస్తోందని, బంటీ పాండే అనే నేరస్థుడి నుంచి కూడా తనకు బెదిరింపులు వచ్చాయని ఆయన చెప్పారు. తాను ఎన్నడూ పోలీసు భద్రతను కోరలేదని, తన ప్రాణాలకు ముప్పు ఉందనే ఉద్దేశంతో ప్రభుత్వమే 1992లో భద్రత కల్పించిందని, ఇప్పుడు ఏ కారణం లేకుండా ఉపసంహరించుకుందని ఆయన చెప్పారు. మాలేగావ్ లాంటి ప్రాంతాల్లో తమ సంస్థ కార్యకర్తలను మరాఠీయేతర పోలీసులు తీవ్రంగా కొట్టారని ఆయన ఆరోపించారు. తాను మరాఠీల ఆత్మగౌరవం కోసం పోరాడుతూనే ఉంటానని ఆయన చెప్పారు.