వైయస్ నోట ఓవైసీ మాట

న్యూఢిల్లీ: ప్రత్యేక తెలంగాణ రాష్ట్రం ఏర్పాటుపై మజ్లీస్ నేత అసదుద్దీన్ ఓవైసీ మాటలనే ముఖ్యమంత్రి వైయస్ రాజశేఖర రెడ్డి తన నోట వెల్లడించారు. కాంగ్రెస్ పార్టీ అధ్యక్షురాలు సోనియా గాంధీ, ప్రధాని మన్మోహన్ సింగ్ తదితరులతో తెలంగాణపై చర్చించిన అనంతరం ఆయన సోమవారం సాయంత్రం మీడియా ప్రతినిధులతో మాట్లాడారు. ప్రత్యేక తెలంగాణ రాష్ట్రం ఏర్పడితే ముస్లింలకు భద్రత ఉండదని ఓవైసీ అంటున్నారని ఆయన అన్నారు. రాష్ట్రంలో మజ్లీస్ ముస్లింలకు సంబంధించి పెద్ద పార్టీ అని, ఆంధ్రప్రదేశ్ రాష్ట్రంలోనే వటోలీ లాంటి ఘటనలు జరుగుతున్నాయని ఓవైసీ అంటున్నట్లు ఆయన తెలిపారు. తెలంగాణ మీకు రాజకీయమైతే తమకు బతుకు సమస్య అని ఓవైసీ అన్నట్లు ఆయన చెప్పారు.

తెలంగాణపై తన వ్యక్తిగత అభిప్రాయం చెప్పబోనని, పార్టీ వేదికల మీదనే మాట్లాడుతానని ఆయన అన్నారు. తాను తెలంగాణకు హ్యాండ్ బ్రేక్, లెగ్ బ్రేక్ ఏదీ కానని ఆయన అన్నారు. మంత్రులు గొల్లపల్లి సూర్యారావు, జెసి దివాకర్ రెడ్డిల వివాదంపై విచారణకు కమిటీ వేసినట్లు ఆయన తెలిపారు. రాష్ట్రంలో మహిళలు అందరి మాటలూ వింటున్నారని, తాము మహిళలను లక్షాధికారులను చేస్తామని అంటున్నామని, అది వారికి ఇష్టం లేదని ఆయన చిరంజీవిని ఉద్దేశించి అన్నారు.