చిరంజీవి పార్టీలో ఇంటి దొంగలు

హైదరాబాద్: చిరంజీవి నాయకత్వంలోని ప్రజారాజ్యం పార్టీలోని ఇంటి దొంగల విషయం వెలుగులోకి వచ్చింది. ఈ విషయంపై రెండు తెలుగు టీవీ చానెళ్లు బుధవారం వార్తాకథనాన్ని ప్రసారం చేశాయి. ప్రజారాజ్యం పార్టీ కార్యాలయం నుంచి చిరంజీవి వ్యక్తిగత ఫైల్ మాయమైంది. అంతేకాదు, చిరంజీవి తన ఆంతరంగికులతో నిర్వహించిన సమావేశాన్ని రహస్యంగా వీడియో తీశారు. ఈ వీడియో క్లిప్పింగులను కూడా టీవీ చానెళ్లు ప్రసారం చేశాయి. ఇతర పార్టీల నుంచి వారి పట్ల జాగ్రత్తగా ఉండాలని చిరంజీవి తన ఆంతరంగికులకు చెప్పారు. వారిపై నిఘా వేసి ఉంచాలని, వారిపై అనుమానం వస్తే తెలియజేయాలని చిరంజీవి తన ఆంతరంగికులతో చెప్పారు.

అందరికీ అన్ని విషయాలు చెప్పకూడదని, అలా చెప్తే తాము జీరో అవుతామని చిరంజీవి తన ఆంతరంగికులకు పాఠం చెప్పారు. రాజకీయాల్లో తాజాదనం ఉండదని, ఈ విషయంలో జాగ్రత్తగా ఉండాలని ఆయన చెప్పారు. ఇతర పార్టీల నుంచి వచ్చినవారితో కలిసి ఉంటున్నట్లుగా వ్యవహరిస్తూనే ఓ కన్ను వేసి ఉంచాలని ఆయన సూచించారు. నిఘా పెట్టడంలో తప్పు లేదని, ఇందులో మరో ఉద్దేశం లేదని ప్రజారాజ్యం పార్టీ అధికార ప్రతినిధి డాక్టర్ మిత్రా వివరణ ఇచ్చారు. జాగ్రత్తగా ఉండాలని చెప్పడంలో తప్పేం లేదని ఆయన అన్నారు.