మూడు రోజుల్లో నోరు విప్పుతా: జెసి

హైదరాబాద్: తనపై తన సహచర మంత్రి గొల్లపల్లి సూర్యారావు చేసిన ఆరోపణలపై మూడు రోజుల్లో నోరు విప్పుతానని రాష్ట్ర పంచాయతీరాజ్ శాఖ మంత్రి జెసి దివాకర్ రెడ్డి చెప్పారు. గొల్లపల్లి సూర్యారావు తనపై మళ్లీ ఆరోపణలు చేయడం బాధాకరమని ఆయన బుధవారం మీడియా ప్రతినిధులతో అన్నారు. ఆర్థిక మంత్రి కె. రోశయ్య నేతృత్వంలోని ముగ్గురు మంత్రుల కమిటీ తనకు క్లీన్ చిట్ ఇచ్చినట్లు తనతో చెప్పలేదని ఆయన అన్నారు. ముఖ్యమంత్రి డాక్టర్ వైయస్ రాజశేఖర రెడ్డి కూడా తనతో చెప్పలేదని ఆయన అన్నారు. తనపై గొల్లపల్లి సూర్యారావు తిరిగి ఆరోపణలు చేయడంతో జెసి దివాకర్ రెడ్డి హుటాహుటిన రోశయ్యను కలిశారు. ముఖ్యమంత్రి తనది తప్పని గానీ, ఒప్పని గానీ చెప్పలేదని ఆయన అన్నారు.

రోశయ్యను కలిసి వచ్చిన జెసి దివాకర్ రెడ్డిని మీడియా ప్రతినిధులు చుట్టుముట్టారు. దీంతో ఇదేమిటి ఘెరావ్ చేసినట్లుగా ఆయన వ్యాఖ్యానించారు. గొల్లపల్లి సూర్యారావు తాజాగా చేసిన ఆరోపణలపై ప్రస్తావించగా కొత్తగా మాట్లాడుతున్నదేమీ కాదు గదా అని ఆయన అన్నారు. తాను ముఖ్యమంత్రి వైయస్ రాజశేఖర రెడ్డికి అన్నీ వివరించానని, ముఖ్యమంత్రి మాట కోసం ఎదురు చూస్తున్నానని ఆయన చెప్పారు. తాను రోశయ్యకు అన్నీ చెప్పానని, ఆ తర్వాత జరిగిన పరిణామాలేమిటో తనకు తెలియదని, రోశయ్య చెప్పింది టీవీలో విన్నానని ఆయన అన్నారు.