వైయస్ పై యాష్కీ, కెసిఆర్ పై నరేంద్ర

హైదరాబాద్: తెలంగాణ రాష్ట్రం ఏర్పడడం తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావుకు ఇష్టం లేదని తెలంగాణ రాష్ట్ర సమితి (ఎన్) అధ్యక్షుడు ఎ. నరేంద్ర విమర్శించారు. తెలంగాణ ఉద్యమం పేరుతో డబ్బులు దండుకోవడమే కెసిఆర్ చేసే పని అని ఆయన బుధవారం మీడియా ప్రతినిధులతో అన్నారు. దుకాణం నడస్తూ డబ్బులు వస్తూ ఉండాలనేది కెసిఆర్ ఉద్దేశమని ఆయన అన్నారు. 2009లోగా తెలంగాణ రాష్ట్రాన్ని కాంగ్రెస్ ఇస్తుందని, ఈ నమ్మకంతోనే తాను యుపిఎను బలపరిచానని ఆయన అన్నారు. తనను పార్టీ నుంచి పంపించి, లోకసభ నుంచి కూడా పంపించాలని కెసిఆర్ కుట్ర చేశారని ఆయన అన్నారు. తెలంగాణ రాష్ట్రం ఏర్పడితే మత ఘర్షణలు పెరుగుతాయనే వాదనలో పస లేదని ఆయన అన్నారు.

మతాన్ని అడ్డు పెట్టుకుని తెలంగాణ రాష్ట్రం ఏర్పాటును అడ్డుకునేందుకు తమ పార్టీలోని కొందరు ప్రయత్నిస్తున్నారని కాంగ్రెస్ పార్లమెంటు సభ్యుడు మధుయాష్కీ ముఖ్యమంత్రి డాక్టర్ వైయస్ రాజశేఖర రెడ్డిని ఉద్దేశించి అన్నారు. తెలంగాణ రాష్ట్రం ఏర్పడితే కోస్తా, రాయలసీమ ప్రాంతాల్లో కాంగ్రెస్ ఓడిపోతుందని వాదించినవారు తెలుగుదేశం పార్టీ తెలంగాణకు అనుకూలంగా నిర్ణయం తీసుకోవడంతో ముస్లింలను అడ్డు పెట్టే ప్రయత్నం చేస్తున్నారని ఆయన వ్యాఖ్యానించారు. సమైక్యాంధ్రకే కట్టుబడి ఉంటే వారు దాన్ని నేరుగా చెప్పవచ్చునని, అడ్డదారుల్లో తెలంగాణ రాష్ట్రం ఏర్పాటును అడ్డుకునే ప్రయత్నం మంచిది కాదని ఆయన అన్నారు.