హత్య చేయించి మాపైనే ఆరోపణలా?: బాబు

హైదరాబాద్: పరిటాల రవి హత్య కేసులో కీలక నిందితుడు మొద్దు శీను హత్యతో తమ పార్టీవారికి సంబంధం ఉందని కాంగ్రెస్ వారు చేస్తున్న ఆరోపణలపై తెలుగుదేశం పార్టీ అధ్యక్షుడు నారా చంద్రబాబునాయుడు తీవ్రంగా ధ్వజమెత్తారు. తమ పార్లమెంటు సభ్యులను, శాసనసభ్యులను కొనుగోలు చేసిన కాంగ్రెస్ పార్టీకి ఓం ప్రకాష్ వంటి చిల్లర దొంగను కొనడం పెద్ద కష్టం కాదని ఆయన సోమవారం మీడియా ప్రతినిధుల సమావేశంలో అన్నారు. ప్రభుత్వం సిగ్గు లేకుండా తమపైనే విమర్శలు చేస్తోందని ఆయన అన్నారు. మొద్దు శీను హత్య విషయంలో ప్రభుత్వం ఎస్పీతో కట్టుకథలు చెప్పిస్తోందని ఆయన విమర్శించారు. ముఖ్యమంత్రి డాక్టర్ వైయస్ రాజశేఖర రెడ్డి గానీ, హోంమంత్రి గానీ ఎందుకు సమీక్ష జరపలేదని ఆయన ప్రశ్నించారు.

కాంగ్రెస్ పార్టీ తన ప్రత్యర్థులను మట్టుబెట్టడంలో యూజ్ అండ్ కిల్ అనే సూత్రాన్ని అవలంబిస్తోందని ఆయన వ్యాఖ్యానించారు. ఓం ప్రకాష్ తో తమ పార్టీ నాయకులకు సంబంధాలు లేవని, తమ పార్టీ నాయకుడు పరిటాల రవిని చంపి తమపైనే ఆరోపణలు చేస్తారా అని ఆయన అన్నారు. మొద్దు శీను హత్యలో ఒక్కరి కన్నా ఎక్కువ మంది పాల్గొన్నారని ఆయన అన్నారు. మొద్దు శీను హత్యలో సాక్ష్యాలు లేకుండా చేస్తున్నారని ఆయన అన్నారు. మొద్దు శీను హత్యకు ముఖ్యమంత్రి బాధ్యత వహించాలని ఆయన అన్నారు.