చిరు బ్లాక్ మెయిల్ చేస్తున్నారు: పొన్నాల

హైదరాబాద్: ప్రజారాజ్యం పార్టీ అధినేత చిరంజీవి తెలంగాణ ప్రజలను బ్లాక్ మెయిల్ చేస్తున్నారని భారీ నీటి పారుదల మంత్రి పొన్నాల లక్ష్మయ్య అన్నారు. తమను గెలిపిస్తే తెలంగాణ రాష్ట్రం ఏర్పాటుకు మద్దతిస్తామని చిరంజీవి చెప్పడం తెలంగాణ ప్రజలను బ్లాక్ మెయిల్ చేయడమేనని ఆయన సోమవారం మీడియా ప్రతినిధులతో అన్నారు.

కొత్త ప్రాజెక్టుల వద్దని చిరంజీవి అనడాన్ని కూడా ఆయన ఎద్దేవా చేశారు. ప్రాజెక్టుల్లో అవినీతిపై బహిరంగ చర్చకు తమ పార్టీ నాయకుడు హరిరామ జోగయ్యను పంపుతానని చిరంజీవి చెప్పడాన్ని ఆయన వ్యతిరేకించారు. చిరంజీవికి అవగాహన లేకనే హరిరామ జోగయ్యను పంపుతానని అంటున్నారని ఆయన అన్నారు. చిరంజీవి అవగాహన కోసం తాను మొత్తం సమాచారాన్ని పంపినట్లు ఆయన తెలిపారు. సాగునీటి ప్రాజెక్టులపై ఇప్పటికైనా చిరంజీవి అవగాహన చేసుకుని మాట్లాడితే మంచిదని ఆయన అన్నారు.