ఫిబ్రవరి ఎన్నికలపై వైయస్ సూచన?

హైదరాబాద్: ఎన్నికలకు సిద్ధంగా ఉండాలని ముఖ్యమంత్రి డాక్టర్ వైయస్ రాజశేఖర రెడ్డి మంత్రులకు సూచించారు. ఫిబ్రవరిలో ఎన్నికలు జరిగే అవకాశం ఉందని, అయితే ఆరు రాష్ట్రాల ఎన్నికలు పూర్తయిన తర్వాతనే సార్వత్రిక ఎన్నికలు ఎప్పుడనేది తెలుస్తుందని ఆయన అన్నారు. ఎప్పుడు ఎన్నికలు వచ్చినా సిద్ధంగా ఉండాలని, ప్రజల్లోకి మరింతగా వెళ్లాలని ఆయన మంత్రులకు సూచించారు. ఆదివారం జరిగిన మంత్రివర్గ సమావేశంలో ముఖ్యమంత్రి ఎన్నికలపై మాట్లాడినట్లు సమాచారం.

మొద్దు శీను హంతకుడు ఓంప్రకాశ్ సంబంధీకులంతా తెలుగుదేశంవారేనని ముఖ్యమంత్రి అన్నట్లు సమాచారం. జైలులోని వైఫల్యాలపై చర్య తీసుకోవాలని ఆయన హోంమంత్రి కె. జానారెడ్డిని ఆదేశించారు. తెలుగుదేశం పార్టీ కార్యాలయం ఎన్టీఆర్ ట్రస్టు భవన్ రాజకీయ కుట్రలకు కేంద్రంగా మారిందని ఆయన విమర్శించినట్లు తెలుస్తోంది. మొద్దు శీను హత్యపై తెలుగుదేశం పార్టీ అధ్యక్షుడు నారా చంద్రబాబునాయుడి ఆదేశంతోనే ఆ పార్టీ శాసనసభ్యురాలు పరిటాల సునీత మాట మార్చారని ఆయన అన్నట్లు తెలుస్తోంది.