'ప్రిన్స్' రాజకీయ ఎంట్రీ లేదు: అదిశేషగిరి

గుంటూరు: హీరో మహేష్‌బాబు రాజకీయ రంగప్రవేశం ఇప్పట్లో లేదని రాష్ట్ర చలనచిత్ర అభివృద్ధి సంస్థ ఛైర్మన్‌, పీసీసీ ప్రధాన కార్యదర్శి జి. ఆదిశేషగిరిరావు స్పష్టం చేశారు. ముఫ్ఫై ఏళ్ళ కుర్రాడికి రాజకీయాలేంటని వాళ్ళ నాన్న కృష్ణ అప్పుడే చెప్పారని ఆయన అన్నారు. మహేష్‌ యువసేన ప్రభుత్వ పథకాలను వాడవాడలా ప్రచారం చేస్తుందని గుంటూరులోని కాంగ్రెస్‌ పార్టీ కార్యాలయంలో ఏర్పాటువిలేకరుల సమావేశంలో ఆయన చెప్పారు.

కాంగ్రెసు తరఫున ప్రచారం చేయడానికి మహేష్ బాబు రంగంలోకి దించే ప్రయత్నాలు జరుగుతున్నాయని వార్తలు వస్తున్న నేపథ్యంలో ఆదిశేషగిరిరావు ప్రకటన ప్రాధాన్యం సంతరించుకుంది. చిరంజీవి ప్రజారాజ్యం పార్టీని స్థాపించిన తర్వాత, తెలుగుదేశం పార్టీ ప్రచారానికి నందమూరి హీరోలు సిద్ధపడిన తర్వాత కాంగ్రెసు పార్టీ తనకు అనుకూలంగా సినీ ప్రముఖులను కూడగట్టే ప్రయత్నం మొదలు పెట్టింది. ఇందులో భాగంగా మహేష్ బాబును కూడా రంగంలోకి దించే ప్రయత్నం చేస్తున్నట్లు వార్తలు వచ్చాయి.