తాజ్ లో మళ్లీ కాల్పులు మొదలు

ముంబయి: లోన దాక్కున్న ఉగ్రవాదులకు, జాతీయ భద్రతా దళాల కమెండోలకు శుక్రవారం మళ్లీ కాల్పులు జరిగాయి. హోటల్ గ్రౌండ్ ఫ్లోర్ నుంచి పేలుడు శబ్దం కూడా వినిపించింది. తాజ్ హోటల్లో ఒక మిలిటెంట్ దాక్కుని ఉన్నాడని, అతను ఒక అంతస్థు నుంచి మరో అంతస్థుకు తిరుగుతున్నాడని అంతకు ముందు భారత ఆర్మీ కమాండర్ చెప్పారు. అతని వద్ద ఇద్దరు లేదా అంతకు మించి బందీలు ఉండవచ్చునని చెప్పారు.

హోటల్లోని అతిథులను, సిబ్బందిని కాపాడినట్లు లెఫ్టినెంట్ జనరల్ ఎన్. తంబురాజ్ చెప్పారు. కొద్ది గంటల్లో ఆపరేషన్ పూర్తవుతుందని ఆయన చెప్పారు. కొత్త భవంతిని పూర్తిగా స్వాధీనంలోకి తెచ్చుకుని పోలీసులకు అప్పగించినట్లు, ఒక టెర్రరిస్టు పక్కనే ఉన్న పాత హెరిటేజ్ భవంతిలోకి వెళ్లి ఉంటాడని జిఒసి సదర్న్ కమాండ్ చెప్పారు. ఒక పురుషుడు, ఒక స్త్రీ తాము చెరలో ఉన్నట్లు అరిచి చెబుతున్నట్లు ఆయన తెలిపారు.