తెరాస కలిసొస్తే సీట్లపై...: రాఘవులు

హైదరాబాద్: తెలంగాణ రాష్ట్ర సమితి (తెరాస) తమతో కలిసి వస్తే సీట్లపై పంతానికి పోమని సిపిఎం రాష్ట్ర కార్యదర్శి బివి రాఘవులు చెప్పారు. తెరాస తమతో కలిసి వస్తుందనే భావిస్తున్నామని ఆయన అన్నారు. సిపిఎం రాష్ట్ర కార్యదర్శి వర్గ సమావేశానికి శుక్రవారం పార్టీ ప్రధాన కార్యదర్శి ప్రకాష్ కారత్, పోలిట్ బ్యూరో సభ్యుడు సీతారాం ఏచూరి హాజరయ్యారు. ఈ సందర్భంగా కారత్, రాఘవులు మీడియా ప్రతినిధులతో మాట్లాడారు. ఎన్ని సీట్లకు పోటీ చేయాలనే విషయంపైనే ప్రధాన చర్చ జరిగిందని రాఘవులు చెప్పారు.

బిఎస్పీతో పొత్తులు పెట్టుకునే విషయంపై ఇంకా చర్చలు జరపలేదని ప్రకాష్ కారత్ చెప్పారు. ఆంధ్రప్రదేశ్ లో తెలుగుదేశం పార్టీతో, తమిళనాడులో అన్నాడియంకెతో పొత్తులు ఖరారైనట్లు ఆయన తెలిపారు. పొత్తులతో తాము దక్షిణాదిన బలపడతామని ఆయన చెప్పారు. వామపక్షాలు లేకుండా తృతీయ ఫ్రంట్ ఏర్పడితే నిలువదని ఆయన అన్నారు.