కత్తిపోట్ల వల్లే భార్గవి మృతి: పోస్టుమార్టం

హైదరాబాద్‌: సినీ నటి భార్గవి బలమైన కత్తిపోట్ల వల్లనే మృతి చెందినట్లు పోస్టుమార్టం నివేదికలో బయటపడింది. హైదరాబాదులోని బంజారాహిల్స్‌లో హత్యకు గురైనవర్థమాన సినీనటి భార్గవి మృతదేహానికి బుధవారం పోస్ట్‌మార్టం పూర్తయింది. సికింద్రాబాద్‌లోని గాంధీ మార్చురీలో పోస్ట్‌మార్టం జరిగింది. ఆమె హత్య ఉదయం 4-6 గంటలమధ్య జరిగినట్లు డాక్టర్లు నిర్థారించారు. గుండె, వూపిరితిత్తులపై బలమైన గాయాలు తగలటం వల్లే ఆమె మృతి చెందినట్లు వారు తెలిపారు. హత్యకు ముందు ఆమె పెనుగులాడినట్లు కూడా వారు నిర్థారించారు.

భార్గవి మృతదేహాన్ని చూసి ఆమె తల్లిదండ్రులు, బంధువులు బోరున విలపించారు. సంఘటనా స్థలంలో పోలీసులకు ఒక కత్తి లభించిన విషయం తెలిసిందే. ప్రవీణ్ కుమార్ అలియాస్ బుజ్జి ఆమెను హత్య చేసి తాను ఆత్మహత్య చేసుకున్నట్లు భావిస్తున్నారు. ప్రవీణ్ కుమార్ ఇంత పని చేస్తాడని అనుకోలేదని భార్గవి తల్లిదండ్రులు అన్నారు. టీవీల్లో చూసే వరకు తమ కూతురి మరణవార్త తెలియదని వారన్నారు. ప్రవీణ్ కుమార్ తో పెళ్లయినట్లు తమకు తెలియదని వారన్నారు. ప్రవీణ్ కుమార్ సూసైడ్ నోటులోని విషయాలన్నీ అబద్ధాలని భార్గవి తండ్రి ప్రసాదరావు అన్నారు. భార్గవి సంపాదన మీద ఆధారపడాల్సిన అవసరం తమకు లేదని ఆయన అన్నారు.