ప్రధాని చేతిలో అంతూలే రాజీనామా

న్యూఢిల్లీ: మహారాష్ట్ర ఎటిఎస్ చీఫ్ హేమంత్‌ కర్కరే మృతిపై కేంద్ర మైనార్టీ శాఖ మంత్రి అంతూలే చేసిన వ్యాఖ్యలు చివరకు ఆయన పదవికే ప్రమాదం తెచ్చి పెట్టాయి. కర్కరే మృతిపై అనుమానాలు వ్యక్తంచేసి అన్ని పక్షాల విమర్శలను ఆయన ఎదుర్కోవాల్సి వచ్చింది. పార్టీ అధ్యక్షురాలు సోనియా గాంధీ కూడా ఆయనపై ఆగ్రహం వ్యక్తం చేశారు. క్రమశిక్షణసంఘం విచారణ జరిపి తగిన చర్యలు తీసుకుంటుందని ప్రకటించారు. పార్లమెంటులో కూడా నిన్న తీవ్ర దుమారం రేగింది. దీంతో ఎలాగూ తనకు ఉద్వాసన ఖాయమని భావించిన అంతూలే తపన పదవికి రాజీనామా చేయాలని నిర్ణయించుకున్నారు.

అంతూలే తన రాజీనామా లేఖను ప్రధాని డాక్టర్ మన్మోహన్ సింగ్ కు, కాంగ్రెస్ పార్టీ అధ్యక్షురాలు సోనియా గాంధీకి పంపినట్లు సమచారాం. బుధవారం రాత్రే ఆయన తన రాజీనామా లేఖను ప్రధానికి పంపినట్లు తెలుస్తోంది. తాను రాజీనామా చేసినట్లు వార్తలను తాను ధ్రువీకరంచనూ లేను, ఖండించనూ లేనని అంతూలే మీడియా ప్రతినిధులతో చెప్పారు. తాను ఎవరికీ వివరణ ఇవ్వబోనని ఆయన గురువారం చెప్పిన విషయం తెలిసిందే. తాను సోనియాకు గానీ, ప్రధానికి గానీ వివరణ ఇవ్వలేదని ఆయన చెప్పారు. అంతూలేను మంత్రివర్గం నుంచి తొలగించాలని బిజెపి డిమాండ్ చేసింది.