4 నుంచి నెల్లూరు, ప్రకాశం జిల్లాల్లో చిరు టూర్

హైదరాబాద్: ప్రజారాజ్యం అధినేత చిరంజీవి జనవరి 4వతేదీ నుంచి నెల్లూరు, ప్రకాశం జిల్లాల్లో పర్యటించనున్నారు. ఉదయం పూట వివిధ సమస్యల బాధితులతో సమావేశమై మధ్యాహ్నం తరువాత సభల్లో పాల్గొనాలని భావిస్తున్నారు. చిరంజీవి నాలుగో తేదీ ఉదయం చెన్నైలో బయలుదేరి సూళ్లూరుపేటలో మొదటి సభలో పాల్గొంటారు. అనంతరం నాయుడుపేట, వెంకటగిరి, గూడూరు సభల్లో పాల్గొని రాత్రికి గూడూరులో బస చేస్తారు.

5వ తేదీన పొదలకూరు, కసుమూరు, ముత్తుకూరు, నెల్లూరు సభల్లో పాల్గొని రాత్రి నెల్లూరులోనే బస చేస్తారు. 6వ తేదీన బుచ్చిరెడ్డిపాలెం, ఆత్మకూరు, వింజమూరు, కావలి సభల్లో పాల్గొని రాత్రికి కావలిలో నిద్రిస్తారు. 7వ తేదీన నెల్లూరు జిల్లా అల్లూరు సభలో పాల్గొన్న అనంతరం ప్రకాశం జిల్లాలో ప్రవేశిస్తారు. ఈ జిల్లాలో ఎక్కడ సభలు నిర్వహించేదీ ఇంకా నిర్ణయించలేదు.