రాష్ట్రపతి విశాఖ పర్యటన నేడే

విశాఖపట్నం : రాష్ట్రపతి ప్రతిభా పాటిల్‌ తొలిసారిగా శనివారం విశాఖలోని తూర్పునౌకాదళ కేంద్రాన్ని సందర్శించనున్నారు.అక్కడ నౌకాదళ విన్యాసాలను ఆమె వీక్షించనున్నారు. రాష్ట్రపతి రాకను పురస్కరించుకొని పోలీసులు నగరంలో పటిష్టభద్రతను ఏర్పాటుచేశారు.తూర్పు నావికాదళం ఆధ్వర్యంలో నిర్వహించే పలు కార్యక్రమాల్లో ఆమె పాల్గొంటారు.

నావికాదళాధిపతి అడ్మిరల్‌ సురేష్‌ మెహతా, తూర్పు నావికాదళం ఆఫీసర్‌ కమాండింగ్‌ ఇన్‌ చీఫ్‌ వైస్‌ అడ్మిరల్‌ నిర్మల్‌ వర్మ, తదితర నావికా దళ ప్రతినిధులు ఐఎన్‌ఎస్‌ డేగ వద్ద ఆమెకు స్వాగతం పలకనున్నారు. రాష్ట్రపతి పర్యటన నేపథ్యంలో తూర్పు నావికా దళం (ఈఎన్‌సి) అధికారులు గట్టి భద్రతా ఏర్పాట్లు చేశారు. ముఖ్యంగా ఐఎన్‌ఎస్‌ డేగా శత్రు దుర్భేద్యంగా మారింది. రాష్ట్రపతి వ్యక్తిగత భద్రతాధికారులతో చర్చించిన ఈఎన్‌సి అధికారులు, నగర పోలీసు అధికారులు గట్టి బందోబస్తు ఏర్పాటుచేశారు.