రాజు గతే వైఎస్‌కూ: టీడీపీ

హైదరాబాద్ :సత్యం రామలింగరాజుకు పట్టిన గతే ముఖ్యమంత్రి వైఎస్‌కూ పడుతుందని టీడీపీ నేతలు నిన్న జరిగిన మీడియా సమావేశంలో వ్యాఖ్యానించారు. లేని లాభాలను ఉన్నట్టు చూపి కనికట్టు చేయాలని రామలింగరాజు ప్రయత్నిస్తే, రాజశేఖరరెడ్డి లేని అభివృద్ధిని ఉన్నట్టు చూపి వేల కోట్ల నిధుల స్వాహాను కప్పిపుచ్చాలని ప్రయత్నిస్తున్నారని టీడీపీ నేత రేవంత్‌రెడ్డి ఆరోపించారు. టీడీపీ రాష్ట్ర కార్యాలయంలో రేవంత్‌ రెడ్డి, షరీఫ్‌ మీడియాతో మాట్లాడారు.

వైఎస్‌ పరిస్థితి తేలు కుట్టిన దొంగ మాదిరిగా ఉందని విమర్శించారు.ఆయన కూడా తన అవినీతి వ్యవహారాలను రామలింగరాజు మాదిరిగా బహిర్గతం చేసి దిగిపోవడం మంచిదన్నారు. 'ఈ ఇద్దరికీ సన్‌స్ట్రోక్‌ ఉంది. అవినీతి, అక్రమ మార్గాలే వారిని పతనం చేశాయి' అన్నారు. జలయజ్ఞంలో మేటాస్‌ కంపెనీకి రూ. 1600 కోట్ల మొబిలైజేషన్‌ అడ్వాన్సులు ఇచ్చారని తెలిపారు.