రూపాయికే కిలో బియ్యం:కేసీఆర్‌

హైదరాబాద్:మా నీళ్లు మాకిస్తే మేం రూపాయికే బియ్యమిస్తామని తెరాస అధినేత కేసీఆర్‌ ప్రకటించారు. ప్రత్యేక తెలంగాణ రాష్ట్రం గురించి మాట్లాడకుండా రెండు రూపాయలకే కిలో బియ్యమిస్తాం.. పావలా వడ్డీకే రుణాలిస్తాం అంటూ ముఖ్యమంత్రి వైఎస్‌ చెబుతున్నారని ఆయన విమర్శించారు. ఆదివారం పార్టీ కార్యాలయంలో నిజామాబాద్‌జిల్లా ఎల్లారెడ్డి నియోజకవర్గ గిరిజన తండా కమిటీల సభ్యుల శిక్షణ కార్యక్రమం జరిగింది. ఈ సందర్భంగా కేసీఆర్‌ మాట్లాడుతూ.. తెలంగాణ నీళ్లను, నిధులను అక్రమంగా మళ్లిస్తున్నారని ఆరోపించారు. పంట పండించుకోవడానికి నీళ్లు అడుగుతున్నామని, రూ.2 కే బియ్యమిచ్చి భిక్షగాళ్లుగా చేయమని అడగడంలేదని దుయ్యబట్టారు.

దేశంలోని దాదాపు అన్ని పార్టీలు తెలంగాణకు అనుకూలమని ప్రకటించాయన్నారు. రాష్ట్రంలోని పార్టీలన్నీ తెలంగాణకు సై అనకుండా ఉండలేని పరిస్థితి ఏర్పడిందని తెలిపారు. జై తెలంగాణకు అనకపోతే ఓట్లు కాదు.. పోట్లు పడతాయని పేర్కొన్నారు.సమైక్య రాష్ట్రంలో ఉండడంతో తెలంగాణకు అన్ని రంగాల్లో అన్యాయం జరుగుతోందని, గిరిజనులు రిజర్వేషన్లను సైతం కోల్పోతున్నారని విమర్శించారు. ప్రత్యేక రాష్ట్రం ఏర్పడితే ఏర్పడితే గిరిజనులకు 12శాతం రిజర్వేషన్లు వస్తాయని చెప్పారు. విద్య, ఉద్యోగాల్లోనే కాకుండా రాజ్యాధికారంలో కూడా వాటా దక్కుతుందన్నారు.