రాజు ప్రాణాలకు ముప్పు:నన్నపనేని

హైదరాబాద్ :సత్యం రామలింగరాజుకు రాష్ట్ర ప్రభుత్వం నుంచి, ప్రభుత్వ పెద్దల నుంచి ప్రాణహాని ఉందని తెదేపా అధికార ప్రతినిధి నన్నపనేని రాజకుమారి ఆందోళన వ్యక్తం చేశారు. ఆయనకు తక్షణం బెయిల్‌ ఇవ్వాలని, రక్షణ కల్పించాలని ఆమె డిమాండ్‌ చేశారు.ఆమె మీడియాతో మాట్లాడుతూ, జైల్లో ఉన్న మొద్దు శీను హత్య నేపథ్యంలో తనకీ అనుమానం కలుగుతోందన్నారు. ఆరోగ్యం సరిగాలేని రామలింగరాజును వెంటనే ఆస్పత్రిలో చేర్పించి, మెరుగైన వైద్యాన్ని అందించాలని డిమాండ్‌ చేశారు. రామలింగరాజును వాస్తవాలు చెప్పకుండా, మీడియాతో మాట్లాడకుండా నియంత్రిస్తున్నారని, ఆయన్ను తక్షణం మీడియాతో మాట్లాడేందుకు అనుమతివ్వాలని, వాస్తవాలు బయటకు రానివ్వాలని డిమాండ్‌ చేశారు.

రామలింగరాజు పరిస్థితి చూస్తుంటే.. జాలి, బాధ కలుగుతున్నాయన్నారు. మన రాష్ట్రానికి చెందిన క్షత్రియులకు ద్రోహబుద్ధి లేదని ప్రజల కోసం వారు రాజ్యాలు, ఆస్తులు కోల్పోయారని గుర్తుచేశారు. రామలింగరాజు కూడా ఇదే కోవకు చెందుతారన్నారు. ముఖ్యమంత్రి వైఎస్‌, ఆయన కుటుంబ సభ్యులు, మంత్రులు, కాంగ్రెస్‌ ముఖ్యులు అనేక సందర్భాల్లో రాజుపై ఒత్తిడి తెచ్చారని ఆరోపించారు. 'సత్యం' సొంతంగా 108ను ప్రవేశపెడితే, కాంగ్రెస్‌ ప్రభుత్వం హైజాక్‌ చేసి రాజీవ్‌ బొమ్మలు తగిలించిందని దుయ్యబట్టారు.అలాగే పరిటాల రవి హత్య కేసులో నిందితుడైన మొద్దు శీనును చంపించిన విధంగానే రామలింగరాజును కూడా చేస్తారన్న అనుమానం తనకుందని పేర్కొన్నారు.