సిఐడి కస్టడీకి రామలింగరాజు

హైదరాబాద్: సత్యం కంప్యూటర్స్ మాజీ చైర్మన్ బి.రామలింగరాజును నాలుగు రోజుల పాటు సీఐడి పోలీసు కస్టడీకి అనుమతిస్తూ నాంపల్లి కోర్టు శనివారం మధ్యాహ్నం ఆదేశాలు జారీ చేసింది. రామలింగరాజుతో పాటు ఆయన సోదరుడు రామరాజు, సిఎఫ్ వో వడ్లమాని శ్రీనివాస్ లను కూడా సీఐడి కస్టడీకి తరలించనున్నారు.

రామలింగరాజును కోర్టు ఉత్తర్వులు వెలువడిన వెంటనే తమ కస్టడీలోకి తీసుకోడానికి పోలీసులు ఈ ఉదయం నుంచే ఏర్పాట్లు చేసుకున్నారు. ఎనిమిది వేల కోట్ల రూపాయల మేరకు సత్యం కంపెనీ నిధులను రామలింగరాజు దారి మళ్ళించినట్టు ఆరోపణలు ఉన్నాయి. సెబి అధికారులు కూడా తమకు రామలింగరాజును విచారించే అవకాశం కల్పించాలని నాంపల్లి కోర్టులో పిటిషన్ వేశారు. దీనిపై సోమవారం విచారణ జరుగనుంది. సిఐడి పోలీసులు రాజు సోదరులను విచారించడానికి ఎక్కడికి తరలిస్తారో తెలియలేదు.