సీట్లు ఇన్నని చెప్పలేం..చిరు

హైదరాబాద్: రాబోయే ఎన్నికల్లో ప్రజారాజ్యం తరుపున పార్టీ తరపున అందరికంటే ఎక్కువ మొత్తంలో బీసీలకు సీట్లు కేటాయిస్తామని ప్రజారాజ్యం అధినేత చిరంజీవి హామీ ఇచ్చారు. అయితే ఎన్ని సీట్లిస్తామన్న విషయాన్ని మాత్రం ఇప్పుడే స్పష్టం చేయలేమని ఆయన పేర్కొన్నారు. ఆంధ్రప్రదేశ్ అత్యంత వెనుకబడిన కులాల (ఎంబీసీ) సమాఖ్య హైదరాబాద్‌లో నిర్వహించిన సభలో చిరంజీవి పాల్గొని ప్రసంగించారు.

ఈ సమావేశానికి ముందు వివిధ కులాలకు చెందిన నేతలు చిరంజీవితో సమావేశమై మాట్లాడారు. ఈ సందర్భంగా వారు ప్రతి కులానికీ కనీస మొత్తంలో సీట్లు కేటాయించాలని కోరారు. నేతల కోరికను సున్నితంగా తిరస్కరించిన చిరంజీవి మాట్లాడుతూ ప్రతి కులానికి నిర్థిష్ట సంఖ్యలో సీట్లు కేటాయించడం జరిగే విషయం కాదన్నారు.

అయితే సీట్లు కోరుతున్న వర్గాల మనోభావాలను, ఆసక్తిని, మనోవేదనను తాను అర్థం చేసుకున్నానని వచ్చే ఎన్నికల్లో వారికి న్యాయం చేయడానికే ప్రయత్నిస్తానని ఆయన పేర్కొన్నారు. అలాగే లక్ష కోట్ల రాష్ట్ర బడ్జెట్‌లో బీసీల సంక్షేమానికి కేవలం రూ.ఐదువందల కోట్లు కేటాయించడం ఏంటని ఆయన ప్రశ్నించారు.