కాంగ్రెస్ మద్దతు కోరుతాం: కారత్

న్యూఢిల్లీ: సాధారణ ఎన్నికల తర్వాత కేంద్రంలో ప్రత్యామ్నాయ ప్రభుత్వ ఏర్పాటుకు మద్దతు తీసుకోవడానికి కాంగ్రెసుతో చర్చలు జరపడానికి తమకేమీ అభ్యంతరం లేదని సిపిఎం ప్రధాన కార్యదర్శి ప్రకాష్ కారత్ అన్నారు. కాంగ్రెసుతో కలిసి పని చేస్తామని, ప్రత్యామ్నాయ లౌకిక ప్రభుత్వ ఏర్పాటకు మద్దతు ఇవ్వాలని కాంగ్రెసును అడుగుతామని, ఇది సాధ్యమేనని, దాన్ని తోసిపుచ్చలేనని ఆయన ఒక టీవీ చానెల్ కు ఇచ్చిన ఇంటర్వ్యూలో అన్నారు.

చిన్న ప్రాంతీయ పార్టీలతో తృతీయ కూటమి ఏర్పాటులో సిపిఎం పెద్ద శక్తిగా పని చేసిందని, కాంగ్రెసు, బిజెపిల జాతీయ కూటములను సవాల్ చేయడానికి దీన్ని ఏర్పాటు చేశామని ఆయన చెప్పారు. కాంగ్రెసుతో కలిసి పనిచేయడమనేది అంటరానితనానికి సంబంధించింది కాదని, అన్ని పార్టీలతో కలిసి పని చేస్తామని, అయితే అది ఎన్నికల ఫలితాల స్వభావంపై ఆధారపడి ఉంటుందని ఆయన అన్నారు.