బాబు చేతిలో బాలయ్య జాబితా

హైదరాబాద్: సినీ నటుడు బాలకృష్ణ తన అభ్యర్థుల జాబితాను తెలుగుదేశం పార్టీ అధ్యక్షుడు నారా చంద్రబాబునాయుడికి సమర్పించారు. ఆయన శుక్రవారంనాడు చంద్రబాబును కలిసి మాట్లాడారు. ఈ సందర్భంగా జరిగిన చర్చల్లో బాలయ్య తన జాబితాను చంద్రబాబుకు అందజేసినట్లు సమాచారం. బాలయ్య ప్రతిపాదించిన పేర్లలో కోనేరు చిన్ని (కొత్తగూడెం), రమేష్ రెడ్డి (నెల్లూరు), మాగంటి గోపీనాథ్ (హైదరాబాదులో ఏదో ఒక నియోజకవర్గం), శివశక్తి ఆంజనేయులు (వినుకొండ), కదిరి బాబూరావు (కనిగిరి), హర్షవర్ధన్ రెడ్డి (కొల్లాపూర్) ఉన్నట్లు తెలుస్తోంది. ఈ జాబితాపై చంద్రబాబు సానుకూలంగా స్పందించి పరిశీలిస్తానని హామీ ఇచ్చినట్లు తెలుస్తోంది.

కాగా, శుక్రవారంనాడు మాదిగ రిజర్వేషన్ పోరాట సమితి (ఎమ్మార్పీయస్) అధ్యక్షుడు మందకృష్ణ మాదిగ చంద్రబాబును కలుసుకున్నారు. తొలుత 30 అసెంబ్లీ స్థానాలు, 4 పార్లమెంటు స్థానాలు అడిగిన మందకృష్ణ మాదిగ మహా కూటమి దిగి రాకపోవడంతో సగానికి సగం సీట్లను తగ్గించుకునేందుకు సిద్ధపడ్డారు. ఈ నేపథ్యంలో ఎమ్మార్పీయస్ మహా కూటమిలో చేరే విషయమై ఇరువురు మధ్య చర్చలు జరిగాయి. చర్చలు ఒక కొలిక్కి రాకపోవడంతో మరోసారి చర్చలు జరపాలని నిర్ణయించుకున్నారు.