చిరంజీవితో అమర్ సింగ్ దోస్తీ

హైదరాబాద్‌: జాతీయ స్థాయిలో కలిసి పని చేయడానికి సమాజ్ వాదీ పార్టీ, చిరంజీవి నేతృత్వంలోని ప్రజారాజ్యం పార్టీ ఒక అవగాహనకు వచ్చాయి. జాతీయ స్థాయిలో తాము కలిసి పని చేయడానికి సిద్ధంగా ఉన్నామని సమాజ్ వాదీ పార్టీ నేత అమర్ సింగ్, ప్రజారాజ్యం పార్టీ అధినేత చిరంజీవి ప్రకటించారు. చిరంజీవితో అమర్ సింగ్ తమ పార్టీ ప్రధాన కార్యదర్శి, బాలీవుడ్ నటుడు సంజయ్ దత్ తో కలిసి చర్చలు జరిపారు. జాతీయ స్థాయిలో తాము బలమైన కూటమిగా ఏర్పడతామని అమర్ సింగ్ అన్నారు. ములాయం సింగ్, లాలూ ప్రసాద్ యాదవ్, రాం విలాస్ పాశ్వాన్ లు ఏర్పాటు చేసిన లౌకిక కూటమి జాతీయ రాజకీయాలను శాసిస్తుందని ఆయన అన్నారు.

జాతీయ రాజకీయాల్లో తాము సమాజ్ వాదీ పార్టీతో కలిసి పని చేయడానికి సిద్ధంగా ఉన్నామని చిరంజీవి మీడియా ప్రతినిధులతో చెప్పారు. తమ మధ్య భావసారూప్యత ఉందని, సిద్ధాంతాలు కూడా కలుస్తున్నాయని ఆయన అన్నారు. ఈ కూటమిలోకి మరింత మంది కొత్తవాళ్లు వచ్చే అవకాశం ఉందని ఆయన చెప్పారు. జాతీయ స్థాయిలో తాము నాలుగో కూటమిని ఏర్పాటు చేస్తామని చిరంజీవి ఇటీవల మీట్ ది ప్రెస్ కార్యక్రమంలో చెప్పిన విషయం తెలిసిందే.