నక్సల్స్ దాడి: ఏడుగురు మృతి

రాంచీ: తొలి విడత పోలింగ్ జరుగుతున్న జార్ఖండ్ రాష్ట్రంలో మరోసారి మావోయిస్టులు తెగబడ్డారు. బిఎస్ఎఫ్ జవాన్లు ప్రయాణిస్తున్న బస్సుపై వారు గురువారం దాడి చేశారు. ఈ దాడిలో ఏడుగురు మృతి చెందారు. మృతుల్లో ఐదుగురు బిఎస్ఎఫ్ జవాన్లు ఉన్నారు. జార్ఖండ్ లోని లతేహార్ జిల్లాలో ఈ సంఘటన చోటు చేసుకుంది. మృతుల్లో హెల్పర్, బస్సు డ్రైవర్ ఉన్నారు. రాంచీకి 125 కిలోమీటర్ల దూరంలో నక్సల్స్ మందుపాతర పేల్చిన ప్రాంతం ఉంది.

బిఎస్ఎఫ్ జవాన్లు లధూప్ నుంచి ఆరాహ్ కు వెళ్తుండగా ఉదయం ఏడున్నర గంటల ప్రాంతంలో నక్సలైట్లు బస్సును మందపాతరతో పేల్చివేశారు. బుధవారంనాడు మావోయిస్టులు సిఆర్పీఎఫ్ జవాన్లు ప్రయాణిస్తున్న బస్సును పేల్చివేసిన విషయం తెలిసిందే. ఈ ఘటనలో ఒక సిఆర్పీఎఫ్ జవాన్, సబ్ ఇన్స్ పెక్టర్, ఐదుగురు మావోయిస్టులు మరణించారు. జార్ఖండ్ లోని ఆరు లోకసభ స్థానాలకు తొలి విడత గురువారం పోలింగ్ జరుగుతోంది.