ఈసీది కాంగ్రెస్ పక్షపాతం: మాయ

న్యూఢిల్లీ: ఎన్నికల కమిషన్ పై బిఎస్పీ నేత, ఉత్తరప్రదేశ్ ముఖ్యమంత్రి మాయావతి తీవ్రంగా ధ్వజమెత్తారు. ఎన్నికల కమిషన్ కాంగ్రెసుకు అనుకూలంగా వ్యవహరిస్తోందని, కాంగ్రెసు ఆదేశాల ప్రకారం పని చేస్తోందని ఆమె మంగళవారం మీడియా ప్రతినిధుల సమావేశంలో అన్నారు. ఇసిపై రాజకీయ ఒత్తిడి పెరిగిందని, తమ పార్టీకి ప్రజా బలం ఉందని, అయితే తాము అధికారంలోకి రాకుండా ఇసి రాజకీయ ఒత్తిడితో అడ్డుకునే ప్రయత్నం చేస్తోందని ఆమె అన్నారు.

ఇసిగా నవీన్ చావ్లా నేతృత్వంలో నిష్పాక్షికంగా ఎన్నికలు జరిగే పరిస్థితి లేదని ఆమె వ్యాఖ్యానించారు. నవీన్ చావ్లా, ఎస్వై ఖురేషీ కాంగ్రెసు కోటరీలోని మనుషుల్లాగా పని చేస్తున్నారని ఆమె అన్నారు. రాష్ట్రంలో సొంత ప్రయోజనాల కోసం ఖురేషీ ప్రయత్నిస్తున్నారని, దీంతో ఖురేషీ కాంగ్రెసుకు, సమాజ్ వాదీ పార్టీకి అనుకూలంగా పని చేస్తున్నారని ఆమె ఆరోపించారు. నవీన్ చావ్లాకు వ్యతిరేకంగా గోపాలస్వామి రాష్ట్రపతికి లేఖ రాసిన విషయాన్ని ఆమె గుర్తు చేశారు. ఏ సిఇసి మీద కూడా అంత తీవ్రమైన ఆరోపణలు రాలేదని, ఈ పరిస్థితుల్లో చావ్లా తనంత తాను రాజీనామా చేయాల్సి ఉండిందని, కానీ దురదృష్టవశాత్తు అది జరగలేదని ఆమె అన్నారు.